Oracle համաշխարհային կորպորացիայի փոխնախագահի վարպետության դասը Մատենայում

15 Մարտ 2022
  • Կիսվել
«Leading Change» ծրագրի մասնակիցների համար վարպետության դաս անցկացրեց ամերիկյան համակարգչային տեխնոլոգիաների կորպորացիայի փոխնախագահ, տեխնոլոգիական բազմաթիվ ընկերությունների հիմնադիր Իգոր Խալաթյանը։ 

Ղեկավարման միջազգային բացառիկ փորձ ունեցող խոսնակը «Բիզնեսի զարգացում, ընդլայնում և թվայնացում» թեմայի շրջանակում մասնակիցների հետ կիսվեց գործնական խորհուրդներով և պատասխանեց ներկաների հարցերին: Ծավալվեց խորքային և ակտիվ քննարկում, որի ընթացքում մասնակիցները ներկայացրին իրենց ընկերություններում առկա խնդիրները և վերհանեցին դրանց լուծման տարբեր ուղիներ։ 
Առանձնացրել ենք մի քանի օգտակար խորհուրդներ և մտքեր, որոնք հնչել են հանդիպման ընթացքում`  
Ես՝ որպես ղեկավար, պատմում եմ ընկերության գործունեության մասին՝ դեպի ուր է այն շարժվում, և թիմի անդամներից յուրաքանչյուրն ինչ ներդրում կարող է ունենալ աշխարհը փոխելու գործում: Նման զրույցներն աշխատակիցներին շատ են մոտիվացնում։ 
Ես բարձրացել եմ Էվերեստը։ Ընկերության կառավարման և լեռը բարձրանալու միջև շատ զուգահեռներ կան: Որքան բարձր եք հասնում, այնքան քիչ թթվածին ունեք: Դուք պետք է ընդմիջում անեք, հարմարվեք նոր պայմաններին, որպեսզի կարողանաք շարունակել։ 
Ես երբեք չեմ մոտենա ինչ-որ մեկին և ասի, որ նա սխալ է։ Ես կփորձեմ դա քննարկել, կփորձեմ համոզել։ Երբեք չեմ պարտադրի։ Միշտ հաղթում է նա, ով ունի լավագույն փաստարկը։ 
Միշտ չէ, որ հաղթում է փողը։ Պետք է լինի զգացողություն, որ այն, ինչ դու անում ես, իսկապես շատ կարևոր է: Ղեկավարներն այստեղ շատ անելիքներ ունեն։ 
Ես, բնակվելով Նյու Յորքում, ունեմ  տեղեկատվության նույն աղբյուրը, ինչ` դուք։ Այսպիսով, մենք կարող ենք գեներացնել նույն գաղափարները և կյանքի կոչել դրանք՝ անկախ գտնվելու վայրից: Ամեն ինչ կախված է ձեր ստեղծագործական մտքից, երևակայությունից և գաղափարը լսարանին հասցնելու կարողությունից: 
  • Կիսվել

Այլ նորություններ Բոլորը