Ավելի քան 800 շրջանավարտների միավորող «Մատենայի» շրջանավարտների ակումբը շարունակաբար աճող առաջնորդների, մասնագետների և փոփոխություններ նախաձեռնող մարդկանց համայնք է, որտեղ ուսուցումը, կապերի ստեղծումն ու զարգացումը շարունակվում են նաև լսարանից դուրս։
Ակումբը կառավարում է Շրջանավարտների խորհուրդը, որը բաղկացած է նախագահից և խորհրդի 10 անդամներից։ Նրանք համատեղ աշխատում են համայնքի զարգացման և շրջանավարտների համար արժեքավոր հնարավորությունների ստեղծման ուղղությամբ։ Խորհրդի աշխատանքը կազմակերպվում է առանձին հանձնախմբերի միջոցով, որոնցից յուրաքանչյուրը կենտրոնացած է որոշակի ուղղության վրա՝ միջոցառումներից և սոցիալական նախաձեռնություններից մինչև սպորտ, համայնքային ծրագրեր և շրջանավարտների հետաքրքրություններից բխող այլ գործունեություն։
Տարվա ընթացքում շրջանավարտներն ունեն միմյանց հանդիպելու և շփվելու բազմաթիվ հնարավորություններ՝ հավաքույթների, պանելային քննարկումների, սոցիալական և սպորտային միջոցառումների, ինչպես նաև շրջանավարտների և նրանց ընտանիքների համար նախատեսված հանդիպումների շրջանակում։ Ամեն տարի համայնքը նաև համախմբվում է Շրջանավարտների գալայի և Մատենատարվա միջոցառումների շուրջ՝ ստեղծելով վերամիավորման և «Մատենայում» միասին անցած ճանապարհը տոնելու առանձնահատուկ պահեր։
«Մատենայի» շրջանավարտների ակումբի հիմքում կապերն են։ Այն միջավայր է, որտեղ շրջանավարտները կարող են ծանոթանալ նոր մարդկանց հետ, ձևավորել արժեքավոր ընկերական և մասնագիտական կապեր, գտնել նոր գործընկերներ, բացահայտել հնարավոր համագործակցություններ, փոխանակվել գաղափարներով և նույնիսկ ստեղծել նոր բիզնես հնարավորություններ։
Որովհետև «Մատենան» ավարտելը ճանապարհի ավարտը չէ։ Դա ողջ կյանքի ընթացքում համայնքի մաս դառնալու սկիզբն է։
